Масҷиди ҷомеи марказии ноҳияи Ҳисор ба номи Имоми Аъзам дар қисмати шимолии деҳаи Тӯдаи ҷамоати деҳоти Мирзо Ризо бунёд ёфтааст. Масҷид дар масофаи 2 км болотар аз шоҳроҳи Душанбе – Турсунзода ҷойгир шудааст. Сохтмони масҷид аз моҳи майи соли 2006 оғоз ёфта, моҳи октябри соли 2009 ба анҷом расидааст. Кори сохтмони он бо дастгирӣ ва саҳмгузории ҷавонмардони саховатманд, соҳибкорони ватанӣ, мардуми деҳаи Тӯда ва деҳаҳои ҷамоати деҳоти Мирзо Ризо ба анҷом расонида шудааст. 

Бинои масҷид дуошёна буда, дорои ду айвон ва як манораи бузург мебошад. Ошёнаи якум ду толори намозгузорӣ дорад,  ки дохили он бо ҳунари гачкорӣ ва нақшу нигори миллӣ оро ёфтааст. Толори аввал дорои 30 сутун буда, 2700 ҷойи намозгузорӣ дорад. Толори дуюм низ бо гачкорӣ ва наққошии миллӣ ороиш ёфтааст. Сақфи толор дорои як гунбази оинакорӣ буда, 12 сутун ва 1400 ҷои намозгузорӣ дорад. Айвони тарафи рост дорои 410 ҷой ва айвони тарафи чап дорои 480 ҷойи намозгузорӣ мебошад.

Ошёнаи дуюм дорои як толор буда, 30 сутун дорад ва аз 2700 ҷойи намозгузорӣ иборат аст. Айвони ошёнаи дуюм дорои 410 ҷойи намозгузорӣ мебошад. Дар маҷмуъ дохили толорҳо ва айвонҳои масҷид 8100 ҷойи намозгузорӣ дорад.

Манораи масҷид аз хишти пухта сохта шуда, бо кошинҳои сафолӣ оро дода шудааст. Баландии манора 36 метр мебошад. Даромадгоҳи асосии масҷид бо ду манора ороиш ёфтааст, ки «Гулдаста» ном дорад. Деворҳои берунаи масҷид бо кошинҳои сафолӣ зебу зинат ёфтааст.

Масҷид рӯзи 4-уми октябри соли 2009-ум дар арафаи чорабиниҳои бахшида ба «1310 солагии бузургдошти Имоми Аъзам» ба таври расмӣ кушода шуда, номи Имоми Аъзамро гирифтааст.