Оё хушдоман иҷозат дорад, ки келинашро ҳар тавре хоҳад, хидмат фармояд? Оё хидмати келин барои хушдоман воҷиб аст?

Ва алайкумуссалому ва раҳматуллоҳ. Хоҳари азиз, аз нигоҳи шариат хидмати хушдоман дар зиммаи писар воҷиб аст, зеро дар ҳадиси набавӣ хидмати модар се бор таъкид шудааст. Албатта хушдоман барои келин ҳам модар ҳисоб мешавад ва хидмати хушдоман бар зиммаи келин дар сурати зарурат, ҳамчун беморӣ ва дигар ҳолатҳое, ки муносиб ба ҳоли ўст, амри матлуб ва писандида буда, сабаби баракат дар зиндагӣ мешавад. Вале хушдоман ҳақ надорад, ки бо келин муносибати дағалона дошта бошад ва аз ў анҷоми ҳама корҳои хонаро тақозо кунад, балки бо ў ҳамчун духтари худ муносибат намояд, бо шафқату дилсўзӣ ба ў дарси рўзгордорӣ биёмўзад, то фазои хонавода саршор аз меҳру муҳаббат гардад ва миёни афроди хонадон ҳамдигарфаҳмӣ ва якдигарқадркунӣ пойдору устувор бошад.