Табрикоти Шўрои уламои Маркази исломии ҷумҳурии Тоҷикистон ба Раиси Шўрои уламо муҳтарам Саидмукаррам Абдуқодирзода ба муносибати мушарраф шуданашон ба унвони доктори илмҳои филологӣ

Шўрои уламои Маркази исломии ҷумҳурии Тоҷикистон ба Раиси Шўрои уламо муҳтарам Саидмукаррам Абдуқодирзода ба муносибати ҳимояи рисолаи илмиашон дар мавзўъи “ҳусайн Воизи Кошифӣ ва суннати тафсирнигории қуръон ба забони форсии тоҷикӣ (асрҳои X-XV)” ва шарафёб шуданашон ба унвони доктори илмҳои филологӣ табрику таҳнияти самимона арз намуда, аз даргоҳи Худованди Мутаъол барояшон комёбиву сарбаландӣ дар зиндагӣ ва тавфиқу пирўзӣ дар роҳи хидмат ба дину мардуми кишвар орзуманд аст. Боиси хушҳолӣ ва сарфарозии ҳар як ходими дини кишвар аст, ки дар таърихи қариб як қарни гузашта нахустин бор як нафар намояндаи дин дар соҳаи илму маориф ба ин унвони баланди илмӣ мушарраф мегардад. Тибқи шаҳодати олимону устодоне, ки дар ҷаласаи илмии ҳимояи рисолаи мазкур иштирок доштанд, Раиси Шўрои уламо ҳамчун унвонҷў ба ҳама суолҳои ҳозирин ҷавобҳои мушаххаси илмӣ дода, дар ҳимоя кардани рисолаи хеш бисёр муваффақ буданд.

Дар ҳақиқат, Раиси Шўрои уламо ҳамчун як фидоии роҳи илм ҳама қуввату ғайрати худро барои пешрафти арзишҳои динӣ ва миллӣ сарф намуда, дар роҳи таҳкиму тақвияти мазҳаби ҳанафӣ ва баланд бардоштани сатҳи ахлоқу маънавиёти ҷомеа саҳми назаррас доранд.

Умед аст, ки ноил шудани Саидмукаррам Абдуқодирзода ба ин унвони баланди илмӣ ба эшон рўҳу илҳоми тоза бахшида, барои омода ва ба камол расонидани шогирдону мутахассисони варзида дар соҳаи илм ва хидмат ба дину мазҳаб ва мардуми кишвар омили муҳим хоҳад гардид.

Шўрои уламои Маркази исломии ҷумҳурии Тоҷикистон бори дигар доктор Саидмукаррам Абдуқодирзодаро бо ин унвони баланди илмӣ шодбошу таҳният гуфта, барояшон комёбӣ ва саодати дорайнро таманно дорад.

Шўрои уламои Маркази исломии ҷумҳурии Тоҷикистон