مسألة № 00872
Оё мумкин аст, ки рӯзҳои ҷумъа аз сабаби ба кор дер накардан баъд аз хондани суннати пас аз фарз бе дуо ва тасбеҳ баромада равем?
مسألة:
Ассалому алайкум домуллои азиз. Чаро дар масҷидҳо баъд аз намози шом тасбеҳ нахонда, бо як дуо намозро ҷамъбаст мекунанд, вале баъд аз дигар намозҳо се-чор дуо мекунанд. Ҳукми тасбеҳ хондан баъд аз намоз чист? Оё мумкин аст, ки рӯзҳои ҷумъа аз сабаби ба кор дер накардан баъд аз хондани суннати пас аз фарз бе дуо ва тасбеҳ баромада равем?
Саволдиҳанда: Аҳмад
إجابة:
Ва алайкумуссалому ва раҳматуллоҳи ва баракотуҳу. Бародари азиз, ҳукми тасбеҳ гуфтан аз нигоҳи фиқҳи мазҳаби ҳанафӣ пас аз панҷ намоз суннат аст. Аммо дар урфи мардуми мо дуо кардан пас аз намози шом бидуни тасбеҳ меъмул шудааст. Албатта агар тасбеҳ гуфта, пасон дуо карда шавад, ин ҳам тибқи суннат аст ва халале эҷод намекунад. Рӯзи ҷумъа рӯзи иҷобати дуо ва вақти нузули хайру баракат мебошад ва он қадар вақтро ҳам намегирад, инчунин аз байни мардум бархоста рафтан хилофи одоб ва сабаби озурдахотирии намозгузорон мегардад, бинобар ин, сабр кардан хуб аст.
