Изҳороти Шўрои уламои Маркази исломии Ҷумҳурии Тоҷикистон

Мо мусалмонони Тоҷикистон бо изҳори ҳамдилӣ ва ҳамбастагӣ бо тамоми мусалмонони ҷаҳон партоби мушакро, ки шӯришгарони Ҳусӣ 27 октябри соли 2016 ба ҷониби Маккаи мукаррама, қиблаи мусалмонони ҷаҳон, гаҳвораи Ислом ва сарзамини Расули Акрам (с) анҷом доданд,  қотеона маҳкум менамоем.

Ин амали зишту нафратангез, ки дар маҳдудаи мантиқу ақли солим намеғунҷад,  бори дигар исбот мекунад, ки нерӯҳои вайронгар ҳеҷ эҳтироме бар ахлоқу арзишҳои волои динию инсонӣ намегузоранд ва тамаддуни башариятро ба чолиш мекашанд. Қарзи инсонии мост, ки алайҳи чунин нерӯҳо дастаҷамъона мубориза барем.

Идомаи хушунатҳо дар Яман фоҷеаи башарӣ аст ва ба паёмадҳои ногувору мудҳиш барои тамоми минтақа дорад. Ба хотири сулҳу субот ва рифоҳи мардуми мусалмон ҷонибҳои даргирро дар ин кишвар салоҳ аст, ки бар арзишҳои муқаддаси дини мубини Ислом, иззату шарафи инсон ва ахлоқи ҳамида арҷ гузоранд ва бо роҳи гуфтушунид ва ҳусни тафоҳум истиқрори сулҳу адолатро дар сарзамин худ таъмин намоянд.