Марди қиморбозе пас аз бохтани пулҳояш ба қаҳр мегўяд, ки “агар дафъаи дигар қиморбозӣ кунам, имонам аз кофир ва кофир шавам”, лекин бори дигар низ бозӣ мекунад, дар ин ҳолат никоҳи ў чӣ мешавад? Дар ҳоле ки қаблан ду бор ҳамсарашро талоқ дода ва боз таҷдиди никоҳ кардааст.

Ва алайкумуссалому ва раҳматуллоҳ. Бародари азиз, дар ин масъала сухани ин қиморбоз ямин, яъне қасам маҳсуб мешавад ва аз сабаби он ки қасамашро шикаста, боз қиморбозӣ кардааст, каффорати қасам бар ў лозим шудааст. Каффорати қасам ин аст, ки даҳ нафар фақирро наҳору шом ғизо бихўронад ё ба ҳар нафар фақире ним ман гандум (2 кг) ё як ман (4 кг) ҷав ё қимати онро бидиҳад ё даҳ мискинро либос бипўшонад, агар бар яке аз инҳо қодир набошед, се рўз рўза бигирад.