Маънои номи Дилноза чист?

Ва алайкумуссалому ва раҳматуллоҳ. Хоҳари азиз, номи Дилноза аз ду калимаи “дил” ва “ноз” ва пасванди “а”, ки дар охири баъзе исмҳо барои ифодаи ташбеҳ ё нисбат ва ё зиёдат меояд, таркиб ёфтааст. “Дил” маҷозан ба маънои ёр ва маҳбуба, “ноз” ба маъноҳои болидан, ишваю карашма доштан, истиғно ҷустан ва инчунин ба маънои дарахти сарв меояд. Яъне маҳбубае, ки чун сарв зебо аст ё ишваю карашма дорад ва аз ёри худ истиғно ва бениёзӣ меҷўяд. Мумкин аст, ки ин ном шакли мухаффаф (тахфифшуда)-и “дилнавоз” бошад, ки ҳамчун сифат барои васфи ёр ва маҳбуба ба кор меравад, чунонки мегўянд, “ёри дилнавоз”, яъне навозишкор ва меҳрубон. Сипас ба шакли “дилноз” даромада, бо илова шудани пасванди “а” ба охири он ҳамчун исми хосси занона мавриди истеъмол қарор гирифтааст.