Агар муқтадӣ на баробари имом, балки пас аз ба ду тараф салом додани ӯ ба тарафи рост саломашро оғоз кунад, оё намозаш ботил (фосид) мешавад?

Ва алайкумуссалому ва раҳматуллоҳ. 1. Бародари азиз, дар сурати фосид шудани намоз асли он боқӣ мемонад, на васфаш, ба ин маъно, ки он намози фарз ба нафл мубаддал мешавад ва ҳамчун фарз адо намеёбад, аз он намоз савоб ҳосил мешавад, вале аз зимма соқит намешавад. Аммо дар сурати ботил шудани намоз на аслаш боқӣ мемонад ва на васфаш, ба ин маъно, ки он намози фарз комилан аз байн рафта, ба сурати нафл ҳам намемонад ва аз он савобе ҳам ҳосил намешавад. Дар ҳар ду сурати фосидшавӣ ва ботилшавии намоз аз сар гузоридани он лозим мегардад. Мисоли фосид шудани намоз ин аст, ки шахсе чаҳор ракъат намози фарз мегузорад ва пас аз саҷдаи ракъати охир ба ҷои нишастан саҳван бармехезад ва як ракъати дигар мегузорад. Дар ин ҳолат намоз фосид шуда, ба нафл мубаддал мегардад ва аз он савоб ҳосил мешавад. Мисоли ботил шудани намоз ин аст, ки шахсе дар намози фарз қасдан сухан мегӯяд. Дар ин ҳолат намоз ботил мешавад ва савобе аз он ҳосил намешавад.  2. Агар муқтадӣ баробари имом салом ҳам надиҳад, намозаш бидуни нуқсон дуруст мешавад.