Қарори маҷлиси Шӯрои уламо дар бораи оғози моҳи шарифи Рамазон

Қарори маҷлиси Шӯрои уламо дар бораи оғози моҳи шарифи Рамазон

     Имрӯз 25.02.2025 дар маҷлисгоҳи Маркази исломии Ҷумҳурии Тоҷикистон ҷаласаи навбатии Раёсати Шӯрои уламо баргузор гардид. Раиси Шӯрои уламои Маркази исломӣ Саидмукаррам Абдуқодирзода ҳозиринро ба муносибати омад-омади моҳи мубораки Рамазон табрику таҳният гуфта, изҳор дошт, ки мувофиқи далелҳои илмӣ ва дар асоси хулосаи Институти астрофизикаи Академияи миллии илмҳои Ҷумҳурии Тоҷикистон имсол моҳи мубораки Рамазон дар кишвар рўзи шанбе 1-уми март фаро мерасад.

       Баъдан аъзои Шӯрои уламо масъалаҳои рўзномаи маҷлисро муҳокима ва баррасӣ намуда, чунин қарор карданд:

1. Мувофиқи ҳисоби илмӣ аввали моҳи шарифи Рамазон дар соли 2025 ба ҳисоби тақвимӣ рўзи шанбе 1-уми март муайян карда шавад.
2. Мувофиқи ҳисоби шаръӣ нисоби закот 36000 сомонӣ муқаррар карда шавад, ки аз он 900 сомонӣ закот дода мешавад.
3. Садақаи фитр мувофиқи меъёри шаръӣ ба ҳисоби гандум 8 сомонӣ ва ба ҳисоби мавиз 65 сомонӣ (барои шахсоне, ки тавоноии молии бештар доранд) муайян карда шавад.
4. Фидяи савм дар моҳи шарифи Рамазони соли 2025 барои соҳибони узри шаръӣ (шайхи фонӣ) ва бемороне, ки аз сиҳатшавии онҳо умеде нест ба миқдори 480 сомонӣ барои 30 рўз муайян карда шавад.

         Маҷлис бо дуои хайри аҳли нишаст дар ҳаққи Пешвои миллату мардуми кишвар ҳусни анҷом пазируфт.