Чӣ хел фаҳмем? Кабирӣ демокративу пайравонаш ҷиҳодӣ шудаанд?

Ахиран вақте дар матбуот аз алоқамандӣ ва шабоҳати барномавии гурӯҳи ба ном “Давлати исломӣ” ва ташкилоти террористии ҲНИ матолиби зиёд ба нашр расид, наҳзатиён фиғон бардоштанд, ки онҳо ҳеҷ иртиботе бо ДИИШ надоранду ҳатто худро “ҷонибдори демократия” унвон карданд. Аммо аз ин фиғони наҳзатиён андаке вақт нагузашта, яке аз фаъолтарин пайрави ин ҳизби ифротию террористӣ Абдусалом Одиназода бори дигар дар як навори видеоӣ аз ҳадафҳои ин ҳизб сухан гуфт. Ӯ рӯирост мардумро ба ҷиҳод даъват карда, мехоҳад дар Тоҷикистон, ки 99 дарсади мардум мусулмонанд, бо “куфр” мубориза барад. Ба ҳама маълум аст, ки ҳоло боқимондаҳои гурӯҳи ба ном “Давлати исломӣ” дар хоки Афғонистон паноҳ бурдаанд ва ишораҳои муаллифи ифротии ин навори видеоӣ ба “истифода аз таҷрибаи Афғонистон” ба ҳамин маъност. Одиназодаи террорист (террорист буданашро худаш дар ин навор тасдиқ мекунад) ҷонибдори он аст, ки ҷавонони тоҷик барои омода шудан ба марҳилаи ҷиҳод бояд аз мактабҳои Афғонистону Покистон гузаранд. Афғонистоне, ки вазъаш барои мову ҷомеаи ҷаҳонӣ маълум аст, барои наҳзатиёне чун Одиназода дар он “Ислом гул-гул мешукуфад”. Аз ин навори як ифротии наҳзатӣ ба хулосае расидан мумкин аст, ки ҳарчанд Кабирӣ худ ба хотирӣ боқӣ мондан ва ҷои по ёфтан дар Аврупо худро “демократӣ” нишон медиҳад, аммо дар асл ба хотири расидан ба ҳадафҳои хоҷагонаш ба пайравонаш дастури тарғиби ҷиҳоду қатлу куштор медиҳад. Зеро ҳадафи ниҳоии наҳзат, ҳарчанд худро демократиҷӯю демократихоҳ нишон медиҳад, ҳамоно тарғиб ва ба роҳ мондани инқилоби исломӣ аст.

Парвиз Аминзода,

таҳлилгар