Дуои хайр ва орзуву омоли нек барои миллату кишвар

Дуои хайр ва орзуву омоли нек барои миллату кишвар

Имрӯз раиси Маркази исломии Ҷумҳурии Тоҷикистон Саидмукаррами Абдуқодирзода дар масҷиди марказии ба номи Ҳоҷӣ Яъқуби ш. Душанбе суханронӣ намуд. Мавсуф зимни баромади худ аз сафари расмии ҳайати ҳукуматӣ бо роҳбарии Сарвари давлат, Пешвои миллат, муҳтарам Эмомалӣ Раҳмон ба кишвари Арабистон ёдовар шуда, қайд намуд, ки бо лутфу марҳамати бекарони Худованди азза ва ҷалла ва бо шарофати дастгирии Ҷаноби Олӣ ҳайати мазкур ба дохили хонаи Худо ворид шуда, ду ракъат намоз гузориданд ва Пешвои миллат ҳамроҳ бо ҳайати сафар дар ҳаққи миллату кишвар дуои нек карданд.

Номбурда изҳор дошт, ки рӯйдодҳо ва нооромиҳое, ки имрӯз дар бархе аз кишварҳои мусулмонӣ шуда мегузарад, бояд барои ҳар як фарди солимфикр мояи ибрат бошад. Бинобар ин, ба қадри ин ҳама сулҳу субот ва рушду шукуфоии кишвари азизамон бояд расид ва шукри Худовандро ба ҷо овард.

Намози ҷумъа бо дуои дастаҷамъии намозгузорон дар ҳаққи кишвар ва мардуми шарифи он ба анҷом расид.