Дар таърихи 26.12.2018 дар толори калони кохи «Сомон» ҷаласаи 7-уми якҷояи Маҷлиси миллӣ ва Маҷлиси Олии ҶТ даъват ва баргузор шуд. Дар ин ҷаласа Паёми Асосгузори сулҳу ваҳдати миллӣ – Пешвои миллат, Президенти ҷумҳурии Тоҷикистон муҳтарам Эмомалӣ Раҳмон тавассути шабакаҳои телевизионӣ мустақиман пахш гардид.

Дар низоми арзишҳои миллӣ ва маънавии дилхоҳ миллату давлати ҷаҳон, аз ҷумла Тоҷикистон волотару гаронарзиштар аз амнияту субот нест ва буда ҳам наметавонад. Агар барои сохтмони ягон бино унсури заруртарин таҳкурсии мустаҳками он бошад, барои вуҷуди як ҷомеа ва кишваре, ки ба ояндаи нек умед дорад ва кўшишҳое дар ин ҷода мекунад, омили асосии пешрафт ва рифоҳи зиндагии мардуми он, бешубҳа, сулҳу субот ва амнияту оромӣ ба шумор меравад.

Ҳар кишваре, ки амнияту субот дорад, соҳиби обрў ва эътибори тамоми мардуми олам аст. Мо дар ҷаҳони имрўз мебинем, ки аз тамоми гўшаву канори олам мардуми бесубот ва ё гирифтори хатар ба кишвари амну ором кўч мебанданд. Кишваре, ки амнияту оромӣ надорад ва ҳамеша мардумаш дар ваҳму ҳарос умр ба сар мебарад, чунин тарзи зиндагӣ боиси сар задани ҳар гуна бемориҳои табобатнашаванда мегардад.

Бинобар ин, Пешвои Миллат, муҳтарам Эмомалии Раҳмон аз рӯзҳои нахусти роҳбарияш сулҳи тоҷиконро масъалаи ҳаётан муҳим арзёбӣ намуда, ваъда медод, ки: “Ман ба шумо сулҳ меорам”

Суннат ва арзишҳои ахлоқиву маънавию динии мардумони оламро ваҳдату якдигарфаҳмӣ ташкил дода, инсонҳо дар доираи ин арзишҳо бо ҳусни тафоҳум зиндагӣ мекунанд. Мусаллам аст, ки ҷавҳар ва меҳвари аслии дини мубини Ислом низ ҳамзистиву тарғиби ваҳдату иттиҳод ва шукргузорӣ ба оромиву амният ва суботи саросарӣ маҳсуб меёбад.

Паёми Асосгузори сулҳу ваҳдати миллӣ - Пешвои миллат, Президенти ҷумҳурии Тоҷикистон муҳтарам Эмомалӣ Раҳмон «Дар бораи самтҳои асосии сиёсати дохилию хориҷии ҷумҳурии Тоҷикистон» ба Маҷлиси Олии ҷумҳурии Тоҷикистон воқеаи фараҳбахш ва муҳимтарин анҷоми соли 2018 ба ҳисоб мерафт. Табиист, ки ин санад ҳамчун ҳуҷҷати раҳнамо барои рушди ҳама соҳаҳои зиндагии ҷомеаи Тоҷикистон дастури асосӣ ба шумор меравад.