Мувофиқи ҳисоби шаръӣ нисоби закот ба 22950 сомонӣ баробар аст, ки аз ин миқдор 575 сомонӣ закот дода мешавад". Маблағи 22950 сомонӣ чӣ маъно дорад ва чаро боз 575 сомонӣ оварда шудааст? Хоҳишмандам дар бораи ин ва закот фарохтар маълумот медодед.

Ассалому алайкум. 1. Бародари азиз, барои дарки масоили закот аз илми фиқҳ баҳравар бояд шуд ва дар чанд сатр тафсилоти онро бозгӯ кардан мушкил аст. Закот яке аз рукнҳои панҷонаи Ислом аст ва он иборат аз пардохти ҳиссаи муайяни пул ё мол ба ашхоси ниёзманд аст. Нисоби закот меъёри муайяни пулу мол аст, ки шариат онро муқаррар карда, дар зиммаи ашхоси сарватманд ва доро фарз қарор додааст. Масалан агар шахсе дорои 85 гр тилло ё 600 гр нуқра бошад, аз нигоҳи шариат сарватманд ҳисоб мешавад ва бар ӯ лозим аст, ки аз 40 як ҳиссаи ин миқдор тилло ё нуқраро ба фақиру мискин пардохт намояд. Ҳар сол уламо ва мутахассисони Маркази исломӣ меъёри шаръии закотро бо асъори миллӣ қиматгузорӣ карда нисоби онро муайян мекунанд. Тибқи ҳисоби имсола қимати 85 гр тилло ба 22950 сомонӣ баробар мебошад, ки аз 40 як ҳиссаи он 575 сомониро ташкил медиҳад ва ҳамчун закот пардохт карда мешавад. 2. Фидяи савм қимати ҷуброни рӯза аст, ки шахсони узрманд (пирони бемадор ва бемороне, ки умеди беҳшавиашон вуҷуд надорад) дар ивази ҳар рӯзи рӯза ба ашхоси фақир ва ниёзманд мепардозанд.