Сафари Раиси Шӯрои уламои Маркази исломии Ҷумҳурии Тоҷикистон ба Федератсияи Русия

2017-12-16

4320

Рӯзи 14-уми декабр Раиси Шӯрои уламои Маркази исломии Ҷумҳурии Тоҷикистон Саидмукаррам Абдуқодирзода ҷиҳати анҷоми мулоқот ва вохӯриҳо бо муҳоҷирони тоҷик ва дигар масъалаҳои муҳим ба шаҳри Москваи Федератсияи Русия сафар намуд. Дар рӯзи нахустини сафари худ ба Русия Саидмукаррам Абдуқодирзода дар масҷиди “Хиёбони МИР” бо муҳоҷирони тоҷик, ки дар Русия кору фаъолият менамоянд, мулоқот анҷом дод.

Рӯзи 15-уми декабр дар шаҳри Москва Саидмукаррам Абдуқодирзода бо муфтии мусулмонони Русия Равил Гайниддин мулоқот намуд. Зимни мулоқот ҷонибҳо аз сатҳи кунунии муносибатҳои дӯстонаи миёни Тоҷикистону Русия ва ҳамкориҳои байни Шӯрои уламои Маркази исломии Тоҷикистон ва Идораи мусулмонони Русия изҳори қаноатмандӣ намуда, барои рушди ҳамкориҳои минбаъда ҳавасмандии худро баён доштанд.

Ҳар ду ҷониб бо дарназардошти вазъи кунунии ҷаҳони муосир таҳияи созишномаи дуҷониба оид ба муборизаи муштарак бо ҷараёну ҳаракатҳои экстремистию террористиро ба мақсад мувофиқ арзёбӣ намуданд.

Дар рӯзҳои оянда низ Раиси Шӯрои уламои Маркази исломии Ҷумҳурии Тоҷикистон Саидмукаррам Абдуқодирзода бо муҳоҷирони тоҷики дигар манотиқи Русия мулоқот ва вохӯриҳо анҷом хоҳад дод.