Агар кӯдаке номи яке аз бузургони Исломро дошта бошад ва тез-тез бемор шавад, мегӯянд, ки кӯдак ин номро "бардошта натавонист", номашро иваз намоед, сиҳҳат хоҳад шуд. Аз нигоҳи Ислом то куҷо ин ақида дуруст аст?

Ва алайкумуссалому ва раҳматуллоҳ. Бародари азиз, тансиҳҳатӣ ё бемории инсон ба номи ӯ ягон рабте надорад, балки ин тақдири азалии илоҳӣ аст. Бояд банда ба андозаи тавоноияш баҳри беҳдошти саломатии худ ё фарзандаш саъйу талош намояд. Он сухане, ки дар ин маврид мегӯянд, асоси шаръӣ надорад. Номи инсон фақат дар ҳолате иваз карда мешавад, ки маъно ва мафҳуми нодуруст ва хилофи шариат дошта бошад. Худованд ба бемори шумо шифои оҷил ва сиҳҳати комил ато фармояд.